39
Karlstadráđđádallamat
Norgga bealde ledje veahá balus mo ruoŧŧilaččat galge reageret. Soahteveahka
rustejuvvui ja rádjabearráigeahččit biddjojedje ruoŧarájá ala. Ruoŧŧilaččat eai
dohkkehan ollenge ovttabeallásaš norgalaš ovttastusluvvema, ja muhtumat
evttohedje soađáskit. Muhto Riikabeaivi baicce gáibidii álbmotjienasteami
oaidnin dihtii ahte dorjo go norgalaččat mearrádusa mii lei dahkkon geassemánu
7. beaivve. Jienasteapmi dollui borgemánus seammá jagi. Oppalohkái 360 208:s
vástidedje ahte dohkkehedje ovttastusluvvema, ja dušše 184:s vástidedje ahte eai
dohkkehan dan. Norggas lei garra álbmotlaš dovdu, ja ii ge lean álki spiehkastit
eanetlogus. Muhtun báikkiin begge leat oaguhan olbmuid geaid balle
jienasteames ovttastusluvvema vuostá. Nissoniin ii lean jienastanvuoigatvuohta,
muhto
Riikanissoniid
jienastanvuoigatvuođasearvi
organiserii
vuolláičállinakšuvnna ja 245 000 nissona čálle vuollái ahte dorjo mearrádusa mii
lei dahkkon geassemánu 7. beaivve. Borgemánu maŋimuš beaivve
álggahuvvojedje Karlstádas soabadallamat heaittihit ovttastusa. Ruoŧŧilaččat
háliidedje ahte norgalaš rádjalatnit galge heaittihuvvot ja gaikojuvvot. Lei
ráfehis dilli. Ráđđádallit ledje vuostálagaid dego “bákti bávtti vuostá”,
telegraferii Christian Michelsen Kristianiai čakčamánu 14. beaivve. Eahkedis
gohččojuvvui soahteveahka bálvalussii, ja ráhkkanišgohte soahtái. Beaivvi
maŋŋá vurde norgalaččat vuosttas falleheami nuortta bealde, muhto heahtedilli
jaskkodii. Badjelaš vahku maŋŋá loahpahuvvojedje ráđđádallamat, ja
beavdegirji vuolláičállui. Stuorradiggi mearridii Karlstadsoabaheami
golggotmánu 9. beaivve, ja golggotmánu 26. beaivve mearridii maiddái ruoŧa
Riikabeaivi soabaheami. Seammá beaivvi abdiserii Oscar 2. norgga gonagassan,
ja nu lei ovttastus formálalaččat luvvejuvvon. Ruoŧŧilaččaid gáibádusat heaittihit
ja gaikut rádjalatniid váldojedje vuhtii, ja dušše Kongsvingera rádjaladni ja
boares oasit Fredriksten latnis eai gaikojuvvon.
