38
Ovttastusa luvvema guvlui
Guovvamánu loahpas dagahii ráfehis dilli ahte Francis Hagerupa (1853 – 1921)
norgalaš ráđđehus bieđganii, ja Christian Michelsen (1857 – 1925) šattai
stáhtaministtarin našunála čoahkkeministeriija ovddas. Miessemánus mearridii
Stuorradiggi ovttajienalaččat norgalaš konsuláhttadoaimmahaga lága. Gonagas
Oscar 2. (1829 – 1907) biehttalii dohkkeheames lága, ja dat golbma norgalaš
ministara Stockholmas ohce lobi heaitit. Gonagas ii lean mielas vuolláičállit
beavdegirjji mas heaitinohcamat ledje, muhto kruvdnaprinsa hálahii gonagasa
čállit vuollái. Dat mii baicce gárttai heahtin, lei ahte gonagas ribahii dadjat ahte
son ii sáhttán doarjut ministariid heaitima daningo dalle mat ii sáhttán ásahuvvot
ođđa ráđđehus. Dán cealkámuša ávkkástalai stáhtaministtar Christian Michelsen,
ja geavahii dan vuođđun mearrádussii mii dahkkui geassemánu 7. beaivve,
nammalassii ovttastusa luvvema birra. Dan geažilgo gonagas lei julggaštan iežas
návccaheapmin bidjamis ođđa ráđđehusa riikii, de han son ii šat doaibman
norgga gonagassan, oaivvildii Christian Michelsen. Ja nu luovvanii Norga
ovttastusas Ruoŧain.
Sanksjoneret lága lea seammá go dohkkehit lága. Gonagas fertii sanksjoneret
lága nu ahte dat galggai leat dohkálaš.
Norgga soalddáhat rájá alde 1905:s
