20
Romaálbmot, juvddálaččat ja ruoŧŧilaččat
Romalaččat 1899:s. Amas báikkis.
Norggas eai lean galle romalačča (sigøynera). Jagi 1814 vuođđolágas
joatkašuvve ovddeš mearrádusat mat lohke ahte juvddálaččat, románilaččat ja
romalaččat eai lean buresboahtimat Norgii. Muhto 1800-logu gaskkamuttus
loaččai vierisláhka, ja dat bisttii gitta 1901 rádjai. Dán áigodagas sisafárrejedje
muhtun romalaččat Ungáras ja Romanias Norgii. Sii duddjojedje ja elle
johttigávppašemiin. Eanaš oassi dáin romalaččain ja sin mánáin, geat riegádedje
Norggas, ožžo áiggi mielde pássa, ja šadde Norgga stáhtalahttun. 1901:s
meannuduvvui ođđa ja čavgadabbo vierisláhka, man ulbmil lei ráddjet
sisafárrema. Jagi 1915:s čavgejuvvui láhka ain eambbo. Ulbmil lei doalahit
golgolaččaid, numo romalaččaid ja románilaččaid eret riikkas. Olgoriikkalaš
boargárat geat háliidedje birget johttigávppašemiin ja dujiiguin, dárbbašedje
erenomáš lobi dása. Seammás mearriduvvui ahte dákkár lohpi ii galgan addot
romaálbmogii.
