13
čoahkkanii Eidsvollii cuoŋománu 10.b. Čoahkkimis ledje 112 álbmotválljen
ovddasteaddji geat ledje boahtán miehtá riikka earret Davvi-Norggas. Davimus
fylkkat eai ožžon dieđu áiggis, ja nu eai geargan válljet ovddasteaddjiid geat
livčče jovdan áiggis dohko. Riikkasearvegottis ledje 57 ámmátalbmá, 37
boandda ja 18 fitnodatjođiheaddji.
Fápmojuohkima soahpameahttunvuohta, jienastanvuoigatvuohta ja
gaskavuohta Ruotain
Hui jođánit iđii soahpameahttunvuohta das mo ođđa vuođđoláhka galggai
hábmejuvvot. Okta dain gažaldagain lei fápmojuohkin gonagasa ja stuorradikki
gaskkas. Okta joavku, masa gulle boanddat ja gávpotboargárat, oaivvildii ahte
stuorradikkis galggašii leat dušše ráđđeaddi doaibma. Gonagas galggai guorrasit
dasa, muhto gáibidii ahte sus galgá leat mearrideaddji fápmu. Joavku háliidii
jienastanvuoigatvuođa. Nubbi joavku mas ledje ámmátalbmát ja stuorát
ealáhusjođiheaddjit dáhtto duohta fápmojuohkima gonagasa ja stuorradikki
gaskkas. Dan sadjái sii dáhtto ráddjet jienastanvuoigatvuođa unna elihttabirrasii.
Loahpalaš vuođđoláhkaárvalus šattai kompromissan. Dat mielddisbuvttii juohkit
fámu gonagasa ja stuorradikki gaskkas ja oalle viiddis jienastanvuoigatvuohta. Ii
mange eará vuođđolágas dan áiggi ledje nu radikála jienastannjuolggadusat go
norggas.
