9
Miessemánus 1940:s ledje garra gávnnadeamit gaskal duiskalaččaid ja lihtolaš
veagaid Bjerkvikas Narvika lahka. Golbma njealjádasa huksehusain billašuvve.
Soahtegávnnadeamit Norggas
Lulli-Norggas ledje soahtegávnnadeamit máŋgga sajis, muhto norgga suodjalusas
duođas ii lean makkárge vejolašvuohta čuožžut márranválddi vuostá.
Váldostrategiija šattai leat doalahit várrealážiid nu ahte lihtolaččaid veahkki sáhtii
boahtit oarjin ja bissehit ovddasmannama Østlándda vumiin. Dat lea maiddái
sivvan go dat stuorámus soahtegávnnadeamit ledje Valdresas ja Gudbrandsdalenis.
Bagn buohta Valdresis bissehedje norgga veagat duiskka ovddosmannama.
Gudbrandsdalenis ledje brihttalaččat árjjalaccat soahtegávnnademiin go ledje
boahtán badjel vári Åndalsnesas. Miessemánu álggus ledje soahtedagut
praktihkalaččat nohkan. Steinkjer, Namsos, Molde, Kristiansund ja máŋga eará
norgga gávpoga ja čoahkkebáikki ledje bombejuvvon ja buorre muddui
billašuvvan. Narvikas nagodedje norgga, brihttalaš, fránskalaš ja polskkalaš veagat
garra gávnnademiid čađa ruovttoluotta váldit gávpoga. Dattege mávssii dat menddo
ollu vuoittu ektui doalahit gávpoga. Dál dárbbašedje veagaid eanet Eurohpá
nannámis. Danin guđđe lihtolaš veagat Narvika vahku maŋŋá. Geassemánu 8.
beaivvi fas válde duiskalaččat gávpoga, ja geassemánu 10. beaivvi vuollánii Norga.
Duiskka soahtedagut Norggas ledje nohkan.
