7
Blücher báhččojuvvui sihke Oscarsborggas ja gáddesajádagain. Skiipa loahpas
vuodju Håsullo buohta árrat iđit cuoŋománu 9. beaivvi 1940.
Masá seammá áiggi go čoahkkin dollojuvvui Elverumas, de doalai Vidkun Quisling
sártni radios gos son nammada iežas jođiheaddjin ođđa naššuvnnalaš ráđđehussii.
Dat lei dárbbašlaš go Nygaardsvolda ráđđehus lei báhtaran, muhto seammás addán
dieđu mobiliseret. Quisling dajai ahte vuostálastit duiskka márrama lei seammá go
rihkolaš dahku. Ođđa ráđđehus gos son lei jođiheaddji lei dárbbašlaš suodjalit
norgga álbmoga beroštumiid. Stáhtagomihus bođii áibbas vuorddekeahttá, maiddái
duiskalaččaide. Sis eai lean makkár ge plánat Quislingain. Liikká attii Hitler
gohččosa ahte duiskalaččat galge dohkkehit Quislinga ođđa stáhtaministtarin.
Duiskka dohkkeheapmi datte ge gessojuvvui ruovttoluotta oanehis áiggi maŋŋá go
duiskalaččat áddejedje ahte Quislingas ii lean álbmotluohttámuš.
