6
Koht bijai duiskka gáibádusaid ráđđehusa ovdii, mii lei seammá visttis
Olgoriikkadepartemeantta lanjain Victoria Terrassas, ja máhcai ruovttoluotta
Bräuera lusa čuovvovaš dieđuin: “Mii boahtit várjalit min iešheanalašvuođa.”
“Dalle šaddá soahti,” logai Bräuer, ja “ii mihkki ge sáhte din gádjut”. Dalle galgá
Koht leat vástidan: “Mii eat vuollán eaktodáhtolaččat. Soahti lea jo jođus.”
Sullii seammá áiggi ledje jo dramáhtalaš dáhpáhusat deaividan sihke Narvika
hápmanis ja Drøbaknuoris. Narvikas ledje riddopanserskiippat “Eidsvold” ja
“Norge”. Duiskalaš jagerat (torpedofatnasat) torpederejedje goappašiid fatnasiid.
Oktiibuot masse 284 norgga marinesoalddáha heaggaset. Dušše moattis besse eret
dan galbma čázis áigemunis ja cevze.
Drøbaknuoris Oslovuonas lei duiskka krysserfanas “Blücher” jođus vuona
sisa oktan máŋggain eará fatnasiiguin. Oscarsborg ladni kommandánta, obersta
Birger Eriksena gohččosa mielde, báhče latni veagat máŋga torpedo. “Blücher”
siiggai vuona sisa, állanii ja vuojui. Birrasii 1000 duiskka soalddáha dušše.
“Blüchera” vuodjudeapmi ii sáhttán heađuštit duiskka márrama. Muhto
duiskalaččat maŋŋonedje Oslos nu guhká ahte norgga stuorradiggi, ráđđehus ja
gonagas bállejedje báhtarit davásguvlui toga mielde Hamarii.
Iđđedis okkuperejuvvui Arendal, Kristiansand, Egersund, Stavanger, Bergen,
Troanddin ja Narvika. Fornebuii Osloi ja Solai Stavanger buohta, bohte duiskka
girdiveagat lassin. Earret “Blüchera” vuodjudeapmi, lei márrama vuosttas jándor
militearalaš lihkostuvvan Duiskii.
Cuoŋománu 9. beaivvi eahket – Elverumfápmodus ja
Quislinga stáhtagomihus
Stuorradiggepresideantta Carl Joachim Hambro (1885-1964) vuolggaheami vuolde,
šattai gonagas, ráđđehus ja stuorradiggi čoahkkanit Elverumii cuoŋománu 9.
beaivvi eahkeda. Das attii Stuorradiggi ráđđehussii fápmodusa váldit mearrádusaid
Stuorradikki ovddas dassážiigo Stuorradiggi fas sáhtii čoahkkanit. Formálalaččat
de soaitá fápmodus ii lean dárbbašlaš. Muhto liikká orui dat čohkkejeaddjin. Dat
attii lobálašvuođa ráđđehussii gii sáhtii sárdnut ja jođihit stuorát deattuin ja
luohttevašvuođain. Dát šattai dehálaš go ráđđehus maŋŋá bođii Londonii.
