31
Bástilla fallehuvvo suoidnemánu 14.b.1789:s. Prentehus 1817.
Váiddačállosat historjjálaš gáldun
Boanddaid váidagat leat hui buorit gáldot historihkkáriidda geat háliidit guorahallat
boanddaid árgabeaivvi. Boanddat eanemusat reagerejedje vearuide ja divadiidda maid
sis gáibidedje. Muhto sii maiddái duššástuvve go báikkálaš stuorradálloeaiggádiin lei
vuoigatvuohta riidemiin rasttidit sin bealdduid, sis lei oktovuoigatvuohta elliide
vuvddiin ja vuoigatvuohta gáibidit divadiid vai boanddat galge sáhttit geavahit sin
viidnedeattána, láibunommana ja millu, man sii dihte ávkkástallat nu ollu go vejolaš. Dá
lea oassi váiddačállosis maid Pas-Saint-Lomer boanddat sáddejedje báikkálaš áirasa
mielde seađuid-čoahkkaneapmái:
Dán suohkana ássiin eai leat eará váidagat ovdanbuktit go dat mat juo leat ge
dábálaččat dakkár seađu ja virggi olbmuide, namalassii ahte sii juo mákset beare ollu
vearuid ja iešguđetlágan divadiid. Sii sávašedje ahte moivi ekonomiija- ja
ruhtadoaimmas ii galggaše buktit sidjiide ođđa goarádusaid, go sii eai nagodivčče máksit
šat eambbo vearuid ja sis leat stuora váttisvuođat máksit dálá gáibiduvvon vearuid.
Ferte leat vuoiggalaš ahte riggát veahkehit njulgeme ruhta- ja ekonomiijadoaimma
dili.(...) Sii gávnnahit ahte sii eai leat doarvái bajásčuvgejuvvon ovdanbidjat iežaset
oaiviliid áššiid birra mat galget divaštallojuvvot seađuid – čoahkkaneamis, ja sii luhttet
dan viissisvuhtii ja buori dáhttui mii dievdduin lea geat háliidit válljejuvvot
sáttaolmmožin.
Girjjis: Kristian Moes: Historien i nærlys. Revolušuvnnat Amerihkás ja Frankriikkas,
Aschehoug 1977.
