53
Boandapolitihkkárat. Adolph Tidemand njuohtan 1848.
Boandaustibiid lihkadus juvssai alimus áiggis 1871:s. Dalle ledje sis
30 000 miellahtu, seammá go Thranelihkadusas ledje eanemus áiggi. Dan maŋŋá
manai johtilit ruovttoluotta, ja 1875:s eai lean šat galle miellahtu. Okta maŋás
mannama sivain lei Jaabæk vuosteháhku girku vuostá.
Haugelaččat, thranelaččat ja boandaustitlihkadus ovddastit daid álgo
ovdamearkkaid das ahte vuolleseađu joavkkut servodagas čoagganit ja ovttas
barget iežaset áššiiguin. Haugelaččat ožžo dađe mielde stuorra mearkkašumi
Stuorradikkis ja muđuige servodagas. Sihke thranelaččain ja boandaustibiin
ledje bures huksejuvvon organisašuvnnat, iežaset miellahttobláđđi ja politihkalaš
prográmma. Mii oaidnit dáid lihkadusaid álgun daid politihkalaš bellodagaide
mat dađistaga riegádišgohte loahpageahčai dan čuohtejagi.
Geardduhangažaldagat
1.
Makkár sártni gaskkustii Hans Nielsen Hauge boanddaide?
2.
Manne váldui Hauge gitta?
3.
Makkár áššiid ovddidii Marcus Thrane ja thranelihkadus?
4.
Makkár servodatjoavkkut ledje mielde thranelihkadusas?
5.
Man láhkai oaččui Søren Jaabæk ja boandaustibat váikkuhusa
riikkapolitihkkii?
6.
Manne ožžo boanddat nu ollu áirasiid Stuorradiggái 1868:s?
