14 / 46
14
Liiki
Liiki gárvvoha olles rupmaša ja heive aiddo dutnje. Liiki šaddá go mii šaddat. Dađistaga
go mii boarásmuvvat, báhcá liiki veaháš menddo stuorisin ja šliettasin. Danne leat boares
olbmuin nárvvit miehtá buot rupmaša.
Liiki lea iešguđetlágan iešguđege sajis rupmašis. Muhtin sajiin dat lea asehaš ja linis nu mo muođuin ja
giehtaselggiin. Eará sajiin fas lea assái ja garas nu mo čorbmaváibmosiin ja juolgevuođuin. Don sáhtát ieš
iskat.
Liiki suddje rupmaša ja váruha ahte dat lea aiddo muttágit liekkas siskkil. Juohke sajis liikkis leat unna binna
bánna ráiggážat maid čađa rumaš luoitá
bivastagaid.
Go mii menddo sakka báhkkanit, de
rahpasit bivastatráiggit ja luitet olggos
liegga bivastaga. Rávisolbmot luitet
birrasii lihtterbeali bivastagaid juohke
beaivve. Mánát eai bivastuva nu
olu. Go mii viehkat ja go lea báhkka
olgun, de bivastuvvat liigeolu.
Go mii goallut, giddanit bivastat
ráiggit vai liekkas bissu rupmaša
siste. Go goallut hirbmasit, de bohta
rastet liikeguolggažat. Dalle šaddá
lieggaseabbon guolggaid vuolde.
Liiki várjala min nu ahte baktearat
ja virusat, main sáhttit buohccát, eai
beasa čađa ja sisa. Go bassat liikki, mii
doidit eret duolvvaid oktan baktearai
guin ja virusiiguin. Lea deaŧalaš gieđaid
bassat ovdal go borada, amaset baktearat
ja virusat čuovvut biepmu mielde čoavjái.
Suorpmain ja juolgesuorpmain leat gaccat
liikki alde. Gaccat šaddet oktilaččat. Daid
ferte dávjá čuohppat amaset leat ovddas. Mii
eat dovdda maidege go čuohppat gaccaid ja
vuovttaid.