RUMAŠ

Buot mánát šaddet dainna lágiin ahte okta

siepmansealla áhčis ja okta mannesealla

eatnis suddaba oktii. Dát guokte sealla

sahkaneaba oktan ođđa seallan. Dat ođđa

sealla šaddagoahtá mánnán.

Eatni čoavjjis leat olu manneseallat. Oktii mánus

luovvana okta dain. Dat lea dalle válmmaš gávnnadit

siepmanseallain.

Siepmansealla ii goassege boađe okto. Dat boahtá

oktan olu iežasláganiiguin – birrasii 300 miljovnna.

Dat leat sullii seamma olu go buot olbmot oktiibuot

geat ásset Norggas, Ruoŧas, Suomas, Dánmárkkus,

Islánddas, Englánddas, Duiskkas, Itálias ja Spánias.

Binna bánna siepmanseallaide lea mátki guhkki

mannesealla lusa. Eatnašat ravget eret dakkaviđe

dahje láhppojit dan gaskii. Loahpas leat dušše

muhtin siepmanseallat vel, ja dušše okta áidna sealla

olle mannesealla lusa ja vuoitá!

Sullii bealli siepmanseallain leat nieidaseallat, ja

bealli gándaseallat. Juos dat okta

mii vuoitá lea gándasealla, de

šaddá gándamánná. Juos lea

nieidasealla mii vuoitá,

de šaddá nieidamánná.

Muhto dan eat dieđe

ovdal go mánná lea

riegádan. Amames

nu: Juos háliida,

de sáhttá beassat

diehtit go doavttir

dahje čalbmeeadni

geahččá mo mánás lea

dilli eatni čoavjjis.

Dalán go siepmansealla

lea gávdnan mannesealla,

de seahkánit dan guokte sealla

iešvuođat oktii ja dat šaddá ođđa seallan.

Dát sealla galgá šaddat mánnán. Máná seallas lea

nubbi bealli boahtán eatnis ja nubbi bealli áhčis. Dát

earenoamáš seaguhus šaddá earenoamáš olmmožin

gii lea veaháš eatnis vuohkái ja veaháš áhčis vuohkái,

muhto gii dattege lea aivve ieš.

Dál juo mearrašuvvá šaddet go mánnái alit čalmmit

vai ruškes čalmmit. Mearrašuvvá maid šaddá go

stuorra, gievrras nieida, vai unna, šiervves gánddaš,

ja galgá go su liiki šaddat gámisin vai čuovgadin.

Ii oktage sáhte mearridit makkárin mánná galgá

šaddat. Son šaddá goitge nu go šaddá.

Go lea šaddan diekkár mánnásealla, de dat

giddana goŧŧui eatni čoavjjis. Doppe lea muosset

ja oadjebas, ja doppe oažžu mánná biepmu eatni

siste náhpečoali bokte. Náhpečoalli lea dego jođas

dahje suotna eatni ja máná gaskkas. Mánná ii oppa

vuoiŋŋa ge ieš, muhto oažžu buot maid dárbbaša

náhpečoali bokte.

Čalbmeeadni lea jorddamovra dahje sealge-

eadni, gii veahkeha eatni riegádahttit.