8 / 46
Olggul orru rumaš livttas ja linis, muhto juos mii
geahčastit lagabui, de fuobmát eará: Rumaš lea
ráhkaduvvon olu iešguđetlágan seallain.
Seallat leat dego birccut maiguin rumaš lea huksejuvvon.
Rumaš lea dego bihttáspeallu ja seallat leat birccožat.
Dán bihttáspealus leat hui olu iešguđetlágan bihtát. Lea
ártet jurddašit ahte nu eatnat miljovnnat iešguđetlágan
bihtát heivejit oktii ja gártet oktan olmmožin.
Juos rupmašis galgá leat buorre dilli, de
ferte buot rupmaša seallain maid leat
buorre dilli. Juos seallat galget eallit, de
dárbbašit áimmu ja borramuša. Biepmu
ožžot go mii borrat ja juhkat. Áimmu
ožžot go mii vuoigŋat. Dalle váldet seallat
alcceseaset dan maid dárbbašit. Dat maid eai
dárbbaš, boahtá fas olggos.
Juohke sealla eallá su eallimis ja bargá su
barggus. Sealla siste lea váimmus mii mearrida
maid dat galgá bargat.