1.2 Ságaškuššančálus
Ságaškuššat
Ságaškuššanteavstta ulbmil lea:
- Čájehit ahte don nákcet čiekŋudit áššái
- Oažžut ovdan ášši iešguđet beliid
- Čalmmustahtti sihke iežat ja earáid beliid
Ovdabargu - Lea hui dehálaš!
Ságaškuššan gáibida ovdabarggu jos galggat oažžut ovdan earáid oaiviliid:
- Sáhtát jearahallat olbmuid
- Digaštallat singuin geat dihtet eambbo ášši birra
- Sáhtát girjjiin ja neahttasiidduin ohcat dieđuid
- Sáhtát gávnnahit maid dutkan dadjá fáttá birra
Ágga ja vuosteágga
Ságaškuššanartihkkala deháleamos oassi lea:
- Čalmmustahttit áššis buori ákkaid ja buori vuosteákkaid
Jos ovdamearkka dihtii ášši lea ahte galgetgo skuvllas leat leavssut, de ferte buktit ovdan sihke sin oaiviliid geat dan bealuštit ja maiddái sin oaiviliid geat dan vuostálastet. Oaččo ovdan maid goabbatge bealit oaivvildit.
Mo vuohkkasit čalmmustahttit earáid ákkaid?
- Njuolggositáhta čállit dahje dadjat dárkilit sánis sátnái nu mo son gii siterejuvvo dajai. Dás ferte geavahit mearkka mii čájeha ahte dat lea njuolggositáhta ("). Muitte álmmuhit gáldu, dahje gean dat lea sitáhta.
- Eahpenjuolggositáhtaii čále dahje muital sánis sátnái dan maid siterejuvvon olmmoš dajai, muhto don dego čálli dahje referánta muitalat iežat sániiguin maid son dajai. Dás ii galgga geavahit "-mearkka. Maiddái dás galgá muitit álmmuhit gáldu.
Norga hilgu álgoálbmotrivttiid dálkkádatsoahpamušas
Dálkkádatšiehtadallamiin Parisas, Frankriikkas lea Norga dál árvalan sihkkut álgoálbmotvuoigatvuođaid ovtta oasis dán šiehtadusas. Dáinna lea Sámiráđi presideanta sakka beahtahallan.
Sámiráđi presideanta, Áile Jávo, čuovvu dálkkádatšiehtadallamiid Parisas, muhto álgoálbmogat eai beasa juste šiehtadallanlanjaide, muhto geahččalit váikkuhit juohke ládje vuoi álgoálbmogiid eai guođe šiehtadusas.
Njuolggositáhta ovdamearka:
Behtohallan
-Mun lean dieđusge hui behtohallan go lea Norga gii dáid evttoha ja mii šaddat eará riikkaiguin dál váldit oktavuođa ja daid viggat váikkuhit nu ahte dat vuosttildit Norgga. Dat lea mu mielas hui unohas.
Eahpenjuolggositáhta ovdamearka
Behtohallan
Áile Jávo lohká iežas behtohallon go lea Norga gii evttoha sihkkut álgoálbmotvuoigatvuođaid ovtta oasis dálkkádatšiehtadusas, ja lohká maid sin áigut váldit oktavuođa eará riikkaiguin ávžžuhan dihtii sin vuosttildit Norgga.
Rávvagat
Ákkastala sihke ovdamearkkaiguin ja čilgehusaiguin
- Ágga mii ii leat čilgejuvvon (dán berre garvit)
"Sosiála mediat dagahit nuoraide huša (stress). Dan dihtii ii berre leat lohpi skuvllas geavahit sosiála mediaid.”
- Ágga mii lea čilgejuvvon (geavat dán):
"Okta hástalus sosiála mediaid geavaheamis lea ahte dát geavaheapmi dagaha nuoraide huša (stress). Dutkan čájeha ahte olu ohppiid mielas lea hušša ja maiddái váttis álo fertet čuovvut buot mii neahtas geavvá, ja erenoamážit sosiála mediain. Lea álo juoidá maid olmmoš geasuhuvvo čuovvut. Dat dáidet leat omd facebook- čállosiid kommentárat, dahje ahte doppe leat ságastallamat maidda galggašii searvat. Dan dihtii ii berrešii leat lohpi skuvllas geavahit sosiála mediaid.”
TjaelijiBerteme - TjállijAlmmudahka - ForfatternesForlag - AuthorsPublisher
Kárášjohka
Fitnodatgeaidnu 13
9730 Kárášjohka
Fanasgieddi
Báktegeaidnu 14
9845 Deatnu
Digitála oahpponeavvuid doaimmaheaddji
Doaimmahus