2.4 Bargobihtát

1. Bardde áigelinnjái maid ikte barget iđit rájes gitta eahkedii. Čále das "bed-to-bed” -muitalusa. Go leat geargan, loga dan. Lasit dasto dasa giellásiid ja dáhpáhusaid mat eai leat duođat ja daga ovtta dahje moadde speantageavlli (spenningskurve). Dalle šattai du ievttábeaivi fáhkka ollu gelddoleappot.
   
   
2. Joavkobargu.  Joavkkus 4-5 oasseváldi. Juohkehaččas leat golbma fiskeslihpu. Lihppu 1: namma, lihppu 2: muhtin dáhpáhus, lihppu 3: muhtin báiki/sadji. Dasto bidjabehtet lihpuid 1, 2 ja 3 oktii ja dahkabehtet dain muitalusaid. Diktejehket ja  čállet eambbo ja  viidáseappot.
   
   
3. Vállje muhtin elliid, vuojániid dahje ávdnasiid ja sieluhuhte daid. Čále muitalusa gos sii háleštit ja jurddašit ja árvvoštallet.
   
   
4. Plánejehket muhtin balddihahtti/balddonas/krim muitalusa. Válljejehket ovttas karakteraid, báikki, áiggi ja mii galgá dáhpáhuvvat dan gelddoleamos oasis muitalusas. Dasto juohkehaš čállá iežas muitalusa. PS muitte sátnádit jienaid, hájaid ja daguid (čilget makkár jienat leat, makkár hájat ledje ja mo sii omd. čoalkkuhedje uskii, dahje guovllastedje sisa).
   
   
5. Vállje máidnasiid ja logaid daid. Vállje ovtta dain ja čále seammá máidnasa, muhto don molssut eará karakteraide.
6. Oza dieđuid muhtin stohpoealli dahje luođu ealli birra. Notere dieđuid ja čále ja muital dan birra. Lasit govaid ja/dahje filmmaža.
   
   
7. Joavkkus: Ohcet, čohkkejehket jurdagiid ja ideaid eallingažaldagaide/eallinhástalusaide mat sáhttet leat noveallafáttát. Pláne ja  čále novealla. Muitte guovllastit šáŋŋerdovdomearkkaide ja girjjálašvuođa gaskaomiide. (Eallinhástalusat sáhttet leat: ráhkesvuođamoraš, givssideapmi/olggušteapmi, riiddut ruovttus-/váhnemiiguin/vieljaiguin/oappáiguin, oktonasvuohta, ustitvuohta, duođalaš buohcuvuohta, jápmin, geafivuohta, bargguhisvuohta, earráneapmi, jugešvuohta, stressa)
   
   
8. Lohket noveallaid, románaid, muitalusaid ja máidnasiid. Gávdnet dain iešguđet gielalaš gaskaomiid ja šáŋŋerdovdomearkkaid. Čállet ja muitalehket earáide ceahkis makkár gaskaoamit ja šáŋŋerdovdomearkkat dain leat. Vuođus (begrunn), dahje ákkastala iežat vástádusaid ovddas.