1.1.2 Álggahantipsat

Digaštallančállosa álgu sáhttá muhtomin leat hástalus. Dalle sáhttá válljet eará vugiid álggahit go modeallateavsttas čájehuvvo.

Don sáhtát válljet scenalaš álggu, omd

Erke váccii guvrru lossa lávkkain ruoktot. Son bálkestii lávkka čihkii ja velledii suffái. Son lei váiban čuovvut mielde skuvllas olles beaivvi. Dasa lassin lei su eallin oalle moivvas dán áigge. Ná sáhttá nuoraid árgabeaivi leat. Leavssut ja ruovttubarggut dahket sin vel eambbo streassan. Mun áiggun dán digaštallančállosis....

Don sáhtát válljet historjjálaš álggu, omd:

Dan áigge go min máttut vázze skuvlla lei sin deháleamos fága risttalašvuohta ja lohkan ja čállin. Skuvla lei dušše moadde diimmu beaivái, ja muhtomin dušše muhtin áigodaga, omd.  dálvet. Dasa lassin orro ollugat internáhtain gos ožžo leaksoveahki. Dál leat lagabui logi fága vuođđoskuvllas, ja oahpaheaddjit addet leavssuid buot fágain, ja  vurdet ahte oahppit galget daid okto nákcet. Mun áiggun dán digaštallančállosis...