61
ođastusat dagahedje riidduid. Sosiálisttat gal dorjo ođastusaid, muhto dat
eambbo konservatiiva joavkkut fas oaivvildedje ahte ođastusat bilidedje
bearrašiid.
Dološ eanadoalloservodagas ledje ortnegat mat áimmahušše olbmuid geat
eai birgen ekonomalaččat, nu go omd. boarrásat, buohccit dahje mánát geat ledje
massán váhnemiiddiset. Boaittobeale báikkiin lei geafisystema, mii doaimmai
dan láhkai ahte geafit sáddejuvvojedje boandagárdimiid gaskka gos besse orrut
jos barge veahkkin. Gávpogiin ledje fas almmolaš gefiidviesut, gos seammá
joavkkut ožžo borrat ja orrut barggu ovddas. Dát čovdosat ledje
vuollerádječovdosat. 1800-logu loahpageahčen mieđihišgohte politihkalaččat
dasa ahte stáhtas galggai leat stuorát ovddasvástádus boargáriid dilis.
Sosiálapolitihkka ilbmagođii. Johan Castberg ii duhtan dasa. Su mielas stáhta lei
politihkalaš reaidu, mii galggai maiddái lassin dasa ahte várjalit daid
hearkkimusaid servodagas, geavahuvvot dásset erohusaid olbmuid gaskkas. Dát
politihkka lei ođđaáigásaš buresbirgenstáhta álgu.
Geafisystema lei dološ ortnet mii doaimmai nu ahte máŋga ránnjáš
boandagárdimiin lei ovddasvástádus ollašuhttit guovddáš servodatbargguid,
nugo omd. ráhkkanahttit soalddáhiid, dahje addit guovllu gefiide orrunsaji ja
borramuša.
