60
Mánát bargamin koallakeaillus Rørosas. Govva ii leat áigemeroštallon.
Castbergalaš mánáidlágat
Áigodagas gaskal 1912 ja 1920 lei Gurutbellodagas ráđđehusfápmu, ja okta dain
dehálamos politihkalaš vuoruhansurggiin lei justa sosiálapolitihkka. 1913:s
oaččui riika vuosttas gearddi sosiáladepartemeantta, ja sosiálaministara,
nammalassii Johan Castberg (1862 -1926). Johan Castberg oaivvildii ahte lei
servodaga ovddasvástádus várjalit daid hearkkimusaid. Lei son guhte dagai
dovddusin doahpaga solidarisma, mii mearkkašii ahte olbmot galge ovttasbargat
buoridan dihtii dili buohkaide. Solidarisma galggai dásset servodatluohkáid, ii
ge dagahit riidduid. Vaikko vel Castberg lei sosiálaministtarin dušše jagi, de son
barggai áŋgirit máŋga sosiála ođastusa ovdii jagiin birrasii vuosttas
máilmmisoađi. Ovttas manjiinis, Katti Anker Mølleriin (1868-1945), guhte
barggai erenomáš garrasit buoridan dihtii náitalkeahtes nissoniid ja sin mánáid
dili, barggai Castberg láhkaođastusain mii guoskkai dán jovkui. Lágat
gohčoduvvojedje “castbergalaš mánáidláhkan”, ja mearriduvvojedje vuosttas
máilmmisoađi áigge. Lágain daddjui ahte mánáin, geat ledje riegádan náittosdili
olggobealde, galge leat seammá vuoigatvuođat áhčisteaset nammii ja árbái, go
mánáin geat ledje riegádan náittosdilis. Mearriduvvojedje maiddái lágat mat
adde ekonomalaš doarjaga náitalkeahtes nissoniidda geain ledje mánát, ja mat
adde suodjalusa mánáide geain váhnemat eai orron ovttas. Johan Castberga
