Lávostallan-njuolggadusat:
- Son gii galgá gohkket, ferte čohkkát boaššumusas.
- Ollu sajiin lea eamida ja isida sadji gurut loaiddus boaššumusas.
- Muhtun bearrašiin lea áhčči/isit gii goaivu mállásiid earáide.
- Lávus ferte čohkkát čoahkis vai buohkat čáhket jus leat máŋggas. Ii oktage galggaše dárbbašit uskkis čohkkát.
- Son/sii geat čohkkájit uvssa lagamusas, gohkkejit dola.
- Rissemuoraid váldá lávvui nu ahte gierragat geaigájit olggosguvlui.
- Muoraid, jus leat rissemuorat maiguin dolasta, bidjá dollii nu ahte gierragat geaigájit uvssa guvlui.
- Dolaiguin ii oaččo stoahkat.
- Boaššus leat biepmut ja reaiddut mat gullet biebmoráhkadeapmái. Doppe ii galgga čohkkát, ii ge dohko berre luoitit eará diŋggaid nu go gahpiriid, fáhcaid jna.
- Jus áigu sirdit nuppi loaiddus nubbái, de manná uskki bokte, ii eisege boaššu badjel lávket.
- Árrana badjel ii galgga joreštit, vaikko ii leat ge dolla buollime.
- Jus dárbbaša sirdit eret iežas sajis, de galgá lihkadit nu ahte ii nordda earáid biebmolihtiid, ja nu ahte earáid biepmuide eai gahča ruskkat.
- Galgá mannat nuppiid sealggeduogi jus áigu sirdit eará sadjái dahje mannat olggos.
- Go geargá boradeames, de juohkehaš rádjá iežas borranlihtiid ja -reaidduid nu ahte ieš fas daid gávdná maŋŋel.