241
• Máná ii galgga earuhit váhnemiin iežas dáhtus vuostá,
eará jus lea mánnái buoremusat (artihkal 9).
• Bearašovttastumiid ohcamušat badjel riikkarájiid galget
meannuduvvot positiivalaččat, humána ja johtilis
vuogi mielde. Mánás lea vuoigatvuohta deaivat guktui
váhnemiid jeavddalaččat (artihkal 10).
• Mánás lea lohpi buktit cealkámušaid buot áššiide mat
gusket sutnje ja daid oaiviliid galgá guldalit (artihkal 16).
• Stáhta galgá suodjalit máná fysalaš dahje psykalaš
illásteami vuostá (artihkal 19).
• Stáhta galgá sihkkarastit ahte mánná oažžu dan
sosiálalaš veahki ja ekonomalaš doarjaga mii sutnje gullá
riikka lágaid mielde (artihkal 26).
• Mánás gii gullá minoritehtii dahje álgoálbmogii, lea
vuoigatvuohta ovttas earáiguin iežas joavkkus návddašit
iežas kultuvrra, religiovnna ja iežaset giela (artihkal 30).
• Mánás lea vuoigatvuohta suodjaluvvot ekonomalaš
ávkkástallamiid vuostá mat sáhttet hehttet máná
skuvlavázzima ja ovdánan vejolašvuođaid (artihkal 32).
• Stáhtas lea geatnegasvuohta suodjalit máná buot lágan
vugiid vuostá mat bilidit máná buresbirgejumi (artihkal
36).
• Stáhta galgá hehttet ahte mánnná gii lea vuollil 15 jagi, ii
seaguhuvvo njuolgga soahtedaguide (artihkal 38).
Konvenšuvdna deattuha ahte stáhtas lea ovddasvástádus
dahkat konvenšuvnna dieđuid dovddusin sihke mánáide ja
rávisolbmuide.
Nieiddat ja oahppu
Gávdnojit ollu mánát ja nuorat meahtá máilmmi geain ii
leat vejolašvuohta vázzit skuvlla nu guhká go ieža háliidit.
Geafivuohta lea dasa stuorámus sivvan. Mánáin geat eai
oaččo skuvlafálaldaga, váldo eret ii dušše máhttu muhto
maiddái boahtteáigi.
Datte čájehuvvo ahte jus eadni lea skuvlla vázzán, de lea
stuorát vejolašvuohta ahte mánát maiddái sáddejuvvojit
vázzit skuvlla.
