Skuvlla lea máŋgga dáfus šaddan dehálaš bajásšaddan- ja sosialiserenásahus. Ollu mánát ja nuorat besset dán sosialiserenásahusas hárjehallat ja oahppat buriid ovttastallanvugiid. Nuppe dáfus lea nu ahte doppe lea stuorra máŋggabealatvuohta ja ollu iešguđetlágan dearvvašvuođalaš hástalusat maiguin oahpaheaddjit deaividit ja fertejit čoavdit. Danne leage dál dárbu geassit skuvlii eará profešuvdnajoavkkuid, dego dearvvašvuođadivššáriid, sosiálaoahpaheddjiid, mánáidsuodjaluspedagogaid, birasterapevttaid ja sosionomaid. Dan birra lea maŋimuš jagiid deattuhuvvon máŋgii stuorradiggedieđáhusain, omd ST.D 21 (2016-2017) čuožžu ahte skuvllat leat geatnegahtton bargat máŋggafágalaččat ovttas buoridit konkrehta áššiid eaŋkilohppiid ektui. Lea maiddái sávahahtti ahte skuvla ja skuvladearvvašvuođabálvalus galgaba ásahit lagat fágalaš ja struktuvrralaš ovttasbarggu.

Skuvladearvvašvuođabálvalusa ja skuvla ferteba ovttas ásahit oktasaš árvovuođu ja áddet doahpagiid, ja šiehtadit rollaid ja ovddasvástádusa. Soai ferteba dovdat goabbat guoimmiska njuolggadusaid/láhkaásahusaid. Dasto sáhttiba mearridit deaivvadanbáikkiid ja deaivvadanáiggiid gos digaštallat ja dađistaga ásahit ovttasbarggu, rutiinnaid ja bargojuogu. Skuvladearvvašvuođabálvalus sáhttá oasálastit váhnenčoahkkimiin, skuvllaid plánenbeivviin, ohppiidráđđečoahkkimiin ja eará sullasaš arenain. Skuvladearvvašvuođabálvalus lea okta dain ásahusain mii árrat sáhttá fuobmát loavkideami ja mobbema ja danne lea dehálaš ahte skuvlla ja skuvladearvvasvuođabálvalusa ovttasbargorutiinnat ja bargojuohku leat nannosat ja čielgasat.

Skuvladearvvašvuođabálvalusa bargit sáhttet omd ságastit eaŋkilohppiin, čađahit dearvvašvuođaoahpahusa cehkiin ja joavkkuin. Dáid doaimmaid bokte sáhttet sii fuomášit ollu ja oahpásmuvvat cehkiide ja ohppiide. Sii sáhttet ovttas skuvllain plánet doaibmabijuid bissehit mobbema. Danne go sin bargoáigi ii leat čadnon áige-/diibmoplánaide, de lea sis vejolaš vaikke goas mannat sisa cehkiide ja bissehit fáhkka, duođalaš dáhpáhusaid ja veahkaválddálaš láhttema, dahje váldit olggos ceahkis ohppiid geaid váruhit sáhttet iežaset dahje earáid vahágahttit.

Skuvladearvvašvuođabálvalusa stuorámus ovddasvástádus lea ovttas skuvllain/ oahpaheddjiiguin ja váhnemiiguin dikšut ja fállat heahteveahki ohppiide geat leat vásihan mobbema ja/dahje ieža mobben earáid ja dárbbašit čuovvuleami dan ektui.