Oahpaheaddjit ja skuvlla bargit galget beassat oahppat eambbo ja dan bokte oažžut eambbo gelbbolašvuođa loavkideami ja mobbema ja dan eastadanbarggu birra. Ollu oahpaheaddjit dovdet ahte sii eai máhte ja eai leat oadjebasat das mo fuomášit, bissehit ja gieđahallat loavkideami ja mobbema. Sii ballet dahkamis boastut, ja ballet maiddái loavkideamis ohppiid. Seammás lea nu ahte ollu oahpaheaddjit jearahit eambbo gelbbolašvuođa. Rektor ferte danne sihkkarastit ahte oahpaheaddjit kursejuvvojit ja ožžot gelbbolašvuođa ja reaidduid interveneret.

Son galgá maid láhčit dili nu ahte oahpaheddjiin lea gelbbolašvuohta jođihit ceahki dan láhkai ahte loavkideapmi ja mobben ii dáhpáhuva ja leava ceahkis. Rektor galgá ovttas iežas bargoveagain ásahit rutiinnaid maid buot oahpaheaddjit galget hárjehallat dassá go lea cieggan. Eai galgga bargoveagas leat eahpečielggasvuođat das maid galget bargat go lea sáhka loavkideami ja mobbema fuomášeamis, bisseheamis ja eastadeamis.

Rektoris lea váldoovddasvástádus álggahit ja jođihit rievdadanbargguid skuvllas: Son galgá bagadit ja láhčit áiggi oahpaheddjiide ja skuvlla bargiide háhkat gelbbolašvuođa ja son galgá ovttasráđiid mielbargiiguin suokkardit makkár resurssat dárbbašuvvojit. Soaitá ahte muhtin áigái dárbbašuvvojit lassi ruđalaš resurssat virgádit eambbo ja eará fágabargiid, ja/dahje omd skuvlašilju buoridit.

Rektor galgá ovttas mielbargiiguin ásahit mobbenbargoteama mas lea erenoamáš máhttu ja ovddasvástádus áicat, dutkat, fuomášit ja bargat mobbenáššiiguin mat čuožžilit skuvllas. Dat ii mearkkaš ahte oahppobirasbarggut leat dušše sin duohken. Mobbenbargoteamas galget leat oahpaheaddjit, assisteanttat, skuvladearvvašvuođabargit ja birasbargit. 3-6 oasseváldi joavkkus. Sii galget fuomášit, bissehit ja bidjat johtui doaimmaid ja čuovvoleami mat loahpahuvvojit easkka go mobben lea nohkan.

Sii galget kursejuvvot ja rektor ferte dán ekonomalaččat vuoruhit. ²

Norgga skuvllain lea geavahuvvon ja ain geavahuvvojit ollu iešguđetlágan nu gohčoduvvon mobbeneastadan-prográmmat. Dábálepmosat leat: Olweus, Zero, Zippys venner, Bovnnas bovdnii, PALS, Livsmestring i skolen, Respekt. Lea seammás veara namuhit ahte eiseválddit leat geavahan ollu ruđa dáidda prográmmaide, ja iskosat čájehit ahte mobbenlogut lihkká eai uhccon. Dutkan čájeha ahte doaimmat maid skuvllat ieža hábmejit (skuvlavuođđuduvvon mobbeneastadanprográmmat), implementerejit ja váldet atnui, doibmet buoremusat sin kultuvrii ja dárbbuid mielde. ³ Oahpaheaddjit leat dainna ieža bargan ja ieža hábmen ja ožžot dasa oamastandovddu go leat beassan oahppat ja čiekŋudit fáddái. Dán láhkai dasa šaddá stuorát beroštupmi bargoveagas ja beaktilet čađahanfápmu. Sii šaddet digaštallat ja smiehttat ja árvvoštallat dađistaga mii doaibmá ja mii ii doaimma sin skuvllas, birrasis ja oahppijoavkkus, ja manne. Čájehuvvo maid ahte skuvllat menddo mekánalaččat ja eahpekritihkalaččat čuvvot gárvves mobbeneastadanprográmmaid addon cehkiid ja sii eai dalle fuomáš ođđa mobbenbáikkiid ja mobbenvugiid.

Ii leat ávki dušše smileysain ja buorre-koarttaid juohkit. Oahppit galget oahppat ja áddet ahte oahppat láhttet lea máhttu ja gelbbolašvuohta maid sii dárbbašit olles eallima. Danne ferte mobbeneastadanbargu skuvllas «eallit» ja leat dynámalaš ja rievdaduvvot ja muddejuvvot servodatrievdademiid mielde. Datte áinnas sáhttá osiid dakkár prográmmain árvvoštallat ja heivehit iežas skuvlaárgabeaivái.