Maid galget váhnemat/lagasbiras bargat?
Jos du mánná mobbejuvvo skuvllas,
ja skuvla ii nákce dan bissehit,
de galggat dieđihit ášši stáhtahálddašeaddáji.
Loavkideapmi ja mobben lea servodatváttisvuohta, ja dat dáhpáhuvvá juohke sajis gos olbmot deaivvadit ja ovttastallet. Ollu váhnemat ja bearrašat rahčet, sierranas sivaid geažil, bajásgeassinrollain ja ollu ruovttut leat oktováhnen-ruovttut. Danne fertejit váhnemat ja lagasbiras ovddasvástádusa váldit ja hukset dakkár viiddiduvvon fuolkkástallangiláža ja kollektiiva jurddašeami gos olles giláš lea mielde bajásgeassimin mánáid ja nuoraid dakkár humanisttalaš olmmošoainnus ja árbevirolaš oahppanfilosofiija mielde, ávkin servodahkii. Skuvla ii nákce dan okto. 1 Mii galgat guođđit dan individuála «mu mánná» jurddašeami, ja baicce hukset buorre bajásšaddangiláža buot mánáide. Min mánát.
Váhnemat galget leat rahpasat dasa, ja áddet ahte su mánná sáhttá earáid loavkidit ja mobbet. Váhnemat fertejit dasa váldit iežaset oasi ovddasvástádusas. Dieđusge ii leat somá oažžut dieđu ahte mánná lea ovddidan mobbenláhttenvuogi. Dutkan čájeha ahte rávisolbmuid reakšuvnnat mearkkašit hui ollu dasa ahte bisána go mobben vai ii. 2 Go váhnemat ja lagasbiras reagerejit ja váikkuhit dasa ahte mobben bisána, de das lea stuorra ávki sihke sutnje gii mobbejuvvo ja mobbejeaddjái. Lea maid nu ahte skuvlla árvovuogádagain, eastadanbargguin ja oahppobirasplánain ii leat nu stuorra váikkuhanfápmu jos oahppi boahtá birrasis gos lea toleránsa mobbenláhttenvuohkái.
Váhnemat berrejit smiehttat ja vákšut iežaset cealkinvugiid omd sosiála mediain. Jos vel ii leat jurdda ahte du cealkámušat sosiála mediain njuolga čuhcet nuoraide, de sáhttet dat dulkojuvvot ja áddejuvvot nu ja šaddat unohassan olbmuide/nuoraide geat gullet dan bearrašii ja birrasii.
Buorre ovttasbargu skuvllain ja eará váhnemiiguin, vuogas ja rabas gulahallan ja oktasaš ulbmil ja dáhttu áimmahuššat mánáid ja nuoraid čálggu leat buot dehálaš oasit go áigumuš lea hukset buori oahppobirrasa ja bissehit ja eastadit mobbema servodagas.
Neahttasiiddus gávdnojit rávvagat váhnemiidda das maid bargat jos fuomášat ahte du mánná mobbe earáid ja mo sáhttá eastadit mobbema šaddamis ja ja leavvamis.