Vuosttažettiin lea nu ahte leavssut suoládit min astoáiggi. Go leat joavdan ruoktot sullii dii 15:00, de mii johtilit njielastit veahá honnigkorn dahje cornflakes, ja bargagoahtit leavssuiguin. Ollugat čohkkájit dain gitta čieža-   gávcciáigái ja vel maŋŋelii eahkedii. Dalle ii báze ollu áigi vuoiŋŋasteapmái, gallestaddat skihpáriid, dahje hárjehallat.

 

Viidáset lea nu ahte skuvllas leat oahpaheaddjit ja eará oahppit geat sáhtášedje veahkehit min leavssuiguin ja skuvlabargguiguin. Ii leat álo álki bargat leavssuid go ii leat oktage geas jearrá veahki jos dan dárbbaša. Eai buot váhnemat máhte cuovkka (brøk, mat.) dahje preterihta ja máinnašeami. Bargat ovttas earáiguin lea maid ollu somát ja oahppá eambbo maid dainna.

 

Maŋimustá háliidan vel namuhastit ahte gurput lossa girjjiid ovddos maŋos lea guhkit áigge badjel hirbmat lossat, danne go dat sáhttá váikkuhit čielgeváttuide. Dasa lassin lea bahá vajáldahttit girjjiid ja dehálaš reaidduid ruoktot.

 

Mu konklušuvdna lea ahte leavssuid galggašii heaittihit ja baicce guhkidit skuvlabeivviid. Skuvlabargguide oččošii de oahpaheddjiin veahki.  Dat dagašii maid min árgabeaivvi ollu geahppaset ja mis livččii eambbo astoáigi ja áigi vuoiŋŋastit.

 

Risten (13)