77 / 134
77
Tjaalehvuekieh
Ella Holm Bull
Mov håhkoe
Giesie
Mov håhkoe Johkegaskese båetedh,
gåetiem baeledh, aerniem reejnedh,
riehpenistie hievnien-viermieh sööpedh.
Doerkh dåajodh, doerkestidh.
Dueljiem joevehtidh.
Dållem biejedh.
Tjaetsiem gaaltijistie veedtjedh.
Giemhpestahkesne prihtjh-giebniem steeredh,
prihtjegem voessjedh.
Tsaapestahkem voesseste ohtsedidh.
Tsaapedh, prihtjegem jovkedh.
Åejjie-nalhkem deejedh.
Veelestidh.
Stoerre-johken såakem goltelidh.
Nahkestidh.
Fahkedh.
Dålle jamhkeme.
Aernesne nuvhlieh baatseme.
Soeveste jih orre doerkijste njaelkies-laaken åågkesje.
Annje stoerre-johken fuersiem goltelidh guktie såaka.
Jih manne leam daesnie.
Johkegaskesne, maana-baelien gåetesne.
Gærjeste
Ov-messie darjomes
2000. Idut.