Giela dihtomielalašvuohta

Bargat giela dihtomielalašvuođain lea sirdit fokus giela ja sániid sisdoalus giela ja sániid hápmái.

BUOHKAT DÁRBBAŠIT HÁRJEHALLAT LOHKAT JA ČÁLLIT VAI ŠADDAT VEL BUORET LOHKKIN JA ČÁLLIN

Mii lea giela dihtomielalašvuohta?

Giela dihtomielalašvuohta lea giela vuođđogeađgi ja lohkama vuođđu. Bargat giela dihtomielalašvuođain lea sirdit fokus giela ja sániid sisdoalus giela ja sániid hápmái. Ođđa dutkan čájeha ahte ohppiin geat leat ovddidan nana dihtomielalašvuođa gillii ovdal go álget bustávaiguin ja lohkanhárjehallamiin, eai leat nu stuorra lohkan- ja čállinváttisvuođat.

Mat leat giela dihtomielalašvuođa hárjehallanbarggut?

Giela dihtomielalašvuođa hárjehallanbarggut leat barggut maid bokte oahppit ohppet stávvaljuohkima njuolggadusaid ja hárjehallat lohkat stávvaliid, earuhit vokálaid ja konsonánttaid, ja substantiivvaid ovttaidlogu/eanetlogu, vearbbaid sojahit, hárjehallat dihto jietnadagaid, mearkabidjama, goallossániid fuomášit ja juohkit, ja eará.

Giela dihtomielalašvuođa hárjehallanbargguid sáhttá geavahit buot dásiin ja buohkat geain lea lohkan- ja čállinhástalusat sáhttet dain atnit ávkki. Dákkár hárjehallanbarggut sáhttet eastadit lohkan ja čállinváttisvuođaid šaddamis ja leavvamis. Giela dihtomielalašvuođa hárjehallanbarggut galget geavahuvvot álgolohkama ja álgočállima oktavuođas ja heivehuvvot oahppi lohkan- ja čállineavttuid mielde maiddái bajit dásiin.