VÁRIIN, VÁKKIIN, VUONAIN - Davvisámegiella nubbigiella oahpponeavvoráidu olles vuođđoskuvlii

Fargga ilbmá ođđa ja miellagiddevaš oahpponeavvoráidu mii gusto olles vuođđoskuvlla davvisámegiela nubbigiela lohkanbádjeplánii.
 

 
 
VÁRIIN, VÁKKIIN, VUONAIN lea praktihkalaš ja fáddávuođustuvvon oahpponeavvu, mii lea jurddašuvvon ohppiide geain lea sámegiella nubbigiellan vuođđoskuvllas. Mii deaividit Gáivuona mánáid ja nuoraid, ja beassat sin vásihusaid bokte oahppat sihke sámi báikenamaid, luonddunamahusaid, guliid, lottiid, šattuid namahusaid, geografiija, árbevirolaš eallinvugiid, huksenmálliid ja kulturhistorjjá. Váriin girji gieđahallá fáttá vári, Vákkiin girji gieđahallá fáttá vákki ja Vuonain girji gieđahallá fáttá vuona.  
 
Gihppagat leat jurddašuvvon geavahuvvot oktii ja danne dain leat visot gihppagis, sihke teavsttat, lávlagat, bargobihtát sihke njálmmálaš ja čálalaš hárjehallamii ja sátnelisttut. Buot leat heivehuvvon ohppiid iešguđetge giellamáhtu ja agi mielde. Oahpponeavvuoráidui gullá maid oahpaheaddjibagadus mas leat vástádusat bargobihtáide ja metodalaš guoigalusat oahpaheaddjái. Dat lea gávdnamis min neahttasiiddus fargga. Lassin bidjat mii giellahárjehallanspealuid ja plánššaid iežamet neahttasiidui. Dáid mii ávžžuhit oahpaheaddji čálihit, lamineret ja geavahit giellaovddidanbargguide.
 
Girjjit leat čábbát ja vuohkkasit illustrerejuvvon sihke fotogovaiguin ja sárgosiiguin. Oahpaheaddji guovttos Edel Monsen ja Toril Lyngstad, geat leaba hábmen ja čállán dán oahpponeavvoráiddu, leaba ollu jagiid ieža daid geavahan oahpahusas, árvvoštallan, lasihan ja eret váldán ja divodan osiid. Dál dat lea gárvvis almmuhuvvot ávkin buot sámegieloahpaheddjiide ja ohppiide.


Almmuhan: 27.03.2017
Almmuhan: Mihkku Solbakk