Oskkoldat girjjit skuvllaide
Čavčča mielde ilbmet oskkoldatgirjjit. Ovttas – oahppogirji 5.-7. l. lea vuosttas mii ilbmá.

OVTTAS – oahppogirji 5.-7.c ilbmá čakčii. OVTTAS lea vuosttaš girji
REE-girjeráiddus gaskkadássái. Girji lea čállon Máhttolokten 2006 S mielde, ja gokčá oahppoplána gelbbolašvuođamihttomeriid máilmmioskkoldagain, eallinoainnus ja risttalašvuođas.

Nubbi girji lea sirkumpolára eamiálbmogiid ja sámi dološoskku birra, ja goalmmát girji gokčá filosofiijja ja etihka oasi. Buot girjjit leat ráhkaduvvon 5.-7. ceahkkái oahppogirjin. Girjjiin leat ollu govat, ja differensieren lea bures čovdon, nu ahte girjjit sáhttet geavahuvvot 5. gitta 7. ceahkkái. Dát lea erenoamáš ávkin skuvllaide mat časket oktii cehkiid. Girjjin leat bargobihtát guovtti dásis. Girječálli lea váldán vuhtii ahte girjjiid galgá sáhttit geavahit buot davviriikkain gos davvisámegiella lea oahpahusgiellan.

Dasto ráhkaduvvo oahpaheaddjái resursapearbma mas leat duogášdieđut, vástádusat ja metodalaš fuomášumit, ja kopioriginálat. Lassin mii bidjat govaid ja liŋkkaid min neahttasiidui. Daid sáhttá oahpaheaddji friddja čájehit go lea introduseremin ođđa fáttá, dahje loahpaheamen.



Ođasmahttán 12.09.2011
Almmuhan: Mihkku Solbakk