Mij dáppe 3

64 Ienemus dáhpádusá, ábnnasa ja ásadusá sebrudagán li buore ja ávkken ulmutjijda. Muhtem ábnnasa ja dáhpádusa vas ælla nav buore. Gárramábnnasa , dubáhkka ja snuvsa li dakkár ábnnasa ma ælla buore ulmutjijda. Gárramábnnasa li alkohola ja narkotihka. Dubáhkka ja snuvsa li vas hæggavárálasj oasesgálvvo. Ájgij tjadá li da anedum dálkkasin, návddahibmen ja gárrama diehti. Maŋemus 70 jage ålluj le åtsådiddje gávnnam ahte adnet anon dakkár ábnnasijt le sierraláhkáj várálasj sige rubmelasj ja psykalasj varresvuoda hárraj. Rijka oajválattja li mierredam ahte divna oahppe skåvlån galggi oahppagoahtet dubáhka, snuvsaj, alkohola ja narkotihka birra. Máná ja nuora galggi diehtet man várálattja gárramábnnasa, dubáhka ja snuvsa li. Dalloj de sij diehti dan birra åvdås sij válljiji váldet adnoj dakkár ábnnasijt. Dubáhkka ja snuvsa Dubáhkan ja snuvsajn le ábnas majt gåhttju nikotijnna. Nikotijnna le ábnas majt dubáhka buktadiddje le biddjam dubáhkkaj ja snuvsajda vaj ulmutja galggi tsieggat dasi ja oasstet ja adnet anon juohkka biejve. Gávnnuji aj ållo ietjá ábnnasa dubáhkan ja snuvsajn ma li huj várálattja rubmahij. Dubáhkka ja snuvsa li loabálasj oasesgálvo Vuona rijkan. Dajt máhttá oasstet rámbuvdajn ja friddja adnet anon jus le badjel 18 jage vuoras. Oajválattja ja åtsådiddje diehti ahte dubáhkan ja snuvsaijn li ållo várálasj ábnnasa. Dan diehti de ij le loahpe reklámerit dubáhkav ja ij ge dat oattjo vuojnnut buvddahildojn. Dubáhkav ij le loahpe suovastit almmulasj sajijn. Valla dubák- ja snuksabuktadiddje huoman åhtsi máhttelisvuodajt gåktus vájkkudit nåv ahte nuora álggi suovastit dubáhkav ja adnet snuvsajt anon. Sigárehta li páhkij sinna, muhte- mijn 10 ja muhtemijn 20 juohkka páhken. Snuvsa li plástikkbåksaj sinna vaj e gåjkå. Gárramábnnasa ábnnasa maj baktu gárahuvvá, vuoladuvvá dubákbuktaliddje sij gudi sjaddadi ja oasesti dubáhkav