Mij dáppe 3

35 Áslákin le juoga vuobddet Áslák le huomajam juojddá. Sån le vuojnnám rámbuvdajn ahte sij vuobddi dábálasj tjátjev. Ja de ussjol sån aj máhttá dahkat dav sæmmi. Sujna le ham bullardiddje ája dåbe duogen mij ij goassak galme. – Ulmutja galla de sjaddi oasstet muv rájnna tjátjev, usjudalla Áslák. – Mån de ruvva sjattav boandás ulmusj! Áslák le diŋgum tjielgis tjadátjuovgge båhtolijt påsta baktu. Sån manáj de ja dievdi tjátjev båhtolijda ja bijaj daj muhtem kássa sisi. Ja de manáj sån stádaj dajna kássajn ja fállagådij tjátjev oasen. – Gullit ulmutja, varás ájatjáhtje oasen, esski dievdedum båhtolijda, tjuorvoj Áslák. Stáda lij ulmutjijs dievva. Sij nákkon guhtik guovlluj. Juohkkahattjan låsså puvsa giedajn gånnå juohkka lágásj gálvo nåv gå lájbe, vuoja, mielke, biergo ja nav vil uddnik. Ja muhtemijn aj tjáhtejbåhtola majt rámbuvdan oasstám. – Ájatjáhteje oasen, vikkaj Áslák tjuorvvopt ulmutjijda, valla aktak ij huoman ganugam sujna oasástalátjit. Aktak ij åvvå gehtjastam sunji, sij beri nággijin åvddån miehtáj stáda. Gå iehket bådij, de Áslák ij lim vuobddám åvvå avtak tjáhtebåhtolav. Sån lågŋij kássav fas ietjas bijllaj ja vuoddjáj. – Iv le gal de mån nágin tjiehpes oasestiddje, ussjolij sån ja manáj ruopptot sijddasis. – Ihkap mån vierttiv ságastit náginijn gut máhttá vuobdalit, Nijlasin ham le reklábma-viddnudak, javllá Áslák allasis.