Mij dáppe 3

32 Tjiegos reklábma Gå mij gæhttjap reklámav jali låhkåp jali vuojnnep juojddá mij almmuduvvá, de mij dábálattjat diehtep dát le reklábma. Mij diehtep ahte almmudus jali reklábma le dagádum dan vájkkudime diehti vaj mij galggap oasstet vájku mav. Dalloj aj de mij diehtep ahte mij máhttep válljit jus mij galggap dibddet ietjama årrot oasen. Valla ihkap aj reklábma le majt gåhttju tjiegos reklábma. Gå reklábma le tjiegadum, de mij ep vuojne jali dåbdå davva reklábman. Mij ep åvvå ussjola ahte muhtema viggi juon ge guovlluj vájkkudit mijáv. Dalloj le dat viehka álkke jáhkket dat le duohta majt reklábma giehttu. Gávnnuji má moattelágásj tjiegos rekláma, valla ienemus buktaga majt ij le loahpe reklámerit, daj reklábma le tjiegadum. Buktaåvdedibme Stuorra viddnudagá máhtti mákset millijåvnåjt vaj bessi vuosedit anon ietjasa buktagav TV:a prográmman jali filman gånnå ij le gatjálvis jus dát le reklábma vaj ij. Dåbdos filma maj birra divna ságasti ja vuorddi ahte kinuj galggi boahtet, li duola degu James Bond filma. Dajn filmajn mij vuojnnep mij álu lahkagåvåjt gálvojs majt James Bond adna anon. Da máhtti årrot duola degu gåvvim­ ápparáhta, mobiltelefåvnå, bijla, dáhtora ja juhkusa majt sij filman juhki. Buktaga namma jali logo vuojnnu åvvå tjielgga. Sij gudi li dahkam buktagijt, sij li máksám filmmadahkkev vaj sån galggá vuosedit sijá buktagav. Dat gåhtjoduvvá buktaåvdedibmen. Mij gudi gæhttajap filmav, mij ep åvvå huomaha dát le reklábma. Dakkár buktaåvdedibme le oalle dábálsj TV:a-rájdojn ja filmajn ma vuoseduvvi væráldav birra. Åtsådallama vuosedi ahte buktaga ma li vuojnnum dåbdos kinofilmajn ja TV:a-rájdojn, da li vuobdeduvvam ienebut dalánagi premiera maŋŋela. Tjiegos reklábma. Daniel Craig guhti oavdástallá mihtos James Bond, vuoset dánna muhtem giehtakloahkka-merkav. lahkagåvå gåvå lahka jali gåvå ma li zoomiduvvam premierra vuostasjvuosádus, vuostasjvuosedibme