Sámegiela movttiidahttimii girji


Girji danin ahte movttiidahttit geavahit sámegiela.

"Sámegiella lea sámečeardda heaggasuotna” čálii oahpaheaddji Anders Larsen badjelaš 100 jagi dassái. Seamma namain almmuha ČálliidLágádus girjji Sámečeardda heaggasuotna.
- Girji galggašii movttiidahtti geavahit eanet sámegiela, dadjá girječálli Aage Solbakk.

Solbakk muitala girjjis gávdnojit somás, miellagiddevaš ja buorit muitalusat ja máidnasat čáhcegátti kultuvrras. Erenoamážit luossabivddus, mii áiggiid čađa lea leamašan dehálaš deatnogátte sápmelaččaide. Maiddái gávdnojit sierranas doahpagat meahcásteamis, luossabivddus, ja maiddái soames somás divttat. 

Girji heive buohkaide, ja Solbakk háliidivčče maid ahte oahpaheaddjit geavahit girjji  giellariggodahttima várás. Girjjis lea sátnelistta veahkkin jos it dovdda buot sámi sániid.

Čálli lea dahkan oahpaheaddji ja sámegiela berošteaddji Anders Larsena muittuhusa girjji namman. Sagai Muittalægje aviissas 01.07.1905 son čállá:
 
«Mii diehtit ahte giella lea olmmoš-čeardda heaggasuotna. Go dat nohká ja vajáldahttojuvvo, de nohká maiddái olmmoščearda. Dat sihkkojuvvo dalle olmmoščearddaid logus eret.»
Nu sáhttá maiddái dáhpáhuvvat sámi gielain ja árbevieruiguin, jos juoga ii dahkkojuvvo áimmahuššat daid.
 

Čállán: Amund Johnskareng


Almmuhan: 03.11.2020
Almmuhan: Mihkku Solbakk