Nuorra čálli hástala


Sara Kristine Vuolab ja doaimmaheaddji Liv Tone Boine.
 
Ledjen Girjjálašvuođaguovddážis Kárášjogas go Sara Kristine Vuolab ja doaimmaheaddji Liv Tone Boine almmuheigga Sara vuosttas diktagirjji Gárži. Dovddastan goit vuos dan ahte mun báhcen smiehttat mo galggašin sániiguin govvet dien girjjálašvuođa dáhpáhusa, mas dieđusge Sara diktagirji lei guovddážis.

Guldalettiin čálli ja doaimmaheaddji, ja dasto logadettiin su divttaid, de sátni hástala muitala juo oalle olu, Nuorra čálli Sara lea vuos šaddan hástalit iežas, namalassii dainna mo galgá sániiguin sáhttit darvvihit dieđuid ja dovdduid maid birra mii eat hálašii alladit. Sara lea lihkostuvvan erenoamáš bures iežas áigumušain, go de almmuha iežas vuosttas diktagirjji. Hástalussan lea leamaš čállái dat ge go mearridii rahpat almmolašvuhtii iežas nuorravuođa eallima vásáhusaid ja hástalusaid. Dan birra son muitalii vehá girjji almmuheamis, go doaimmaheaddji Liv Tone su hástala gažaldagain manne?: "Mun doaivvun sii geat rahčet seammalágan jurdagiiguin ja váttisvuođaiguin gávnnašedje doaivaga mu sániin”.

Juo, Sara hástala maiddái lohkki. Loga su Gárži diktagirjji divttaid. Gal don de beasat smiehtadit. 

 
 

Čállán: John T. Solbakk
Govat: Iselin Vuolab ja Helena Vuolab


Ođasmahttán 03.01.2020
Almmuhan: Mihkku Solbakk