Davvisámi báikenamat girjin
Almmuhat miessemánu 13. b. dii. 16.00 (suomaáigge), Deatnu restoráŋŋas Áitesavvona gáttis Ohcejogas.

 
ČálliidLágádus almmuha Samuli Aikio girjji Davvisámi báikenamat miessemánu 13. b. Ohcejogas. Girjái lea čálli čohkken eambbo go 1500 Davvisámi báikenamaid, ja oanehaččat čilgen namaid vuođu ja bohciideami. Das čilge eanaš namaid mearkkašumi.

 
Luobbal Sámmol Sámmol, Samuli Aikio. Govven Kirsti Mikkonen.
 
Guhká lea Luobbal Sámmol Sámmol, Samuli Aikio bargan sámi báikenamaiguin. ČálliidLágádus lea rámis go dál beassá almmuhit su dehálaš barggu girjin.

Girji muitala davvisámeguovllu báikkiin ja daid namain. Dás čálli govvida báikkiid oanehaččat ja seammás čielggada namaid vuođu ja bohciideami. Vállje­ jovvon govat čájehit gal dušše oasi válddáhallon báikkiin, dattege ovttas gártagovaiguin ja čálli báikenamaid čielggademiiguin, girji lea šaddan erenoamáš diehtogáldun.

 

Nuorri, Nuoremuotki. Govven: Amund Johnskareng.
 
Muhton ovdamearka girjjis lea Nuorri Nuoremuotki, dárogillii ožžon nama Hopseidet. Báiki lea seakka muotki Čorgašnjárggas Nuorevuonaid gaskkas. Jagi 1694 eanagirjjis daddjo, ahte ”jávttat leat dolin borjjastan dokko čađa gokko dál gesset fatnasiid badjel ja gokko lea vuovdi” (Finnmark omkring 1700). Ná sámegiella lea seailluhan báikki namas dan dološ dili go dálá guotkku lei velá nuorri, muhto dárogielas báiki gohčoduvvo beare guotkkun, eid.
 
 
Girji almmuheapmi lea miessemánu 13. b. dii. 16.00 (suomaáigge), Deatnu restoráŋŋas Áitesavvona gáttis Ohcejogas. ČálliidLágádus fállá káfe ja gáhkuid.
 
Čálli lea seamma áiggi ávvudeamen iežas 80-jagi riegádan beaivvi. Dan oktavuođas son fállá sierranas prográmma.

Oktavuođat:
Lágádus:
John T. Solbakk, tel +47 915 90 606
Amund Johnkareng, tel +47 416 79 491
Čálli:
Samuli Aikio, tel +358 40 7606491
 


Ođasmahttán 02.05.2017
Almmuhan: Mihkku Solbakk