Ean dieđusge máššan odne, fertiimme Jovnnain finadit Harry Potter girjjiid lágideaddji lahka. Ii vel ge áigumušain sin ageanttaiguin gulahallat, ja jos livccii leamaš dakkár áigumuš, de gal leimme áigá juo galgan soahpat singuin deaivvadeami. Odne lei vel eambbo hušša sin luhtte go ikte. Bahkkesteimme goit hilduid gaskii ovtta gova dihtii, lea dalle juoba Harry Potter pláhkát munno kamera mielde.

Ledne maiddái fuobmán ahte unnit lágádusat gulahallet buoremusat unnit lágádusaiguin, geaid vuordámuš ii leat dahkat erenoamáš stuorra gávppi ja tietnasa girjjiin. Girjjálašvuohta eahpitkeahttá lea stuorra lágádusaide "Big business”. Unnit gielat, ja smávva lágádusat eai leat "stuorráidde” nu miellagiddevaččat. Jos singuin áiggut "gávppašit”, oastit omd. vuoigatvuođaid ráhkadit sámegielat versuvnna, de berre leat ulbmil deaddilit unnimusat 5000 girjji. Mii han Sámis dábálaččat deaddilat 500 ovtta girjjis.

Nu moai sirddiimme Islándii. Lea dovddus ahte islándalaččat leat lohkkis álbmot.
323.000 olbmo Islánddas, ja lágádusat dábálaččat deaddilit 1500 girjji. Norggas 5 million olbmo, lágádusat deaddilit dábálaččat 2000 juohke girjjis. ČálliidLágádus ohcalii dán vuoro islándalaš lágádusain miellagiddevaš nuoraidrománaid. De gal "hálaimmet seamma giela”, sihke lágáduspolitihkalaččat ja kulturpolitihkalaččat, ja dasto 500 ja 1000 deaddilanlohku lea sidjiide oahpes ášši. Doaivumis ČálliidLágádusas ilbmá boahtte jagi islándalaš nuoraidromána sámegillii.

Islánddas gitta Indiai. De lei munnos vuot miellagiddevaš deaivvadeapmi. Máiddái dán ektui: India olmmošlohku 1,252 milliardda, oppa Sámis várra unnit go 100duhát. Muhtin indialaš lágádusas gávnnaimme faktagirjjiid mat sáhtášedje heivet min mánáide. Vuosttas jearaldat dalle: gánniha go joatkit hálešteami jos mii eat áiggošii deaddilit eambo go 1000 girjji. De gánniha, lei fástádus. Dalle han mii duorastaga, maŋemuš beaivvi, soabadallagoahtit sámi vuoigatvuođaid singuin. Lohkat dalle maŋemuš beaivvi raporttas lihkostuvvat go.  

Dát nuppi beaivve raporta šattai dan mađe guhkki, de polskka lágádusaid erenoamáš oassálastima birra báhcá maŋemuš beaivái.