Mii juoiggastat Pirii
Viimmat beassat almmuhit “Piera juoigá“ CD hámis.

Juoigit juiget Pirii, ja muhton dáidá juoiggastit Piera Balto. Viimmat beassat almmuhit "Piera juoigá" CD hámis.  ČálliidLágádus bovde erenoamáš juoigandáhpáhussii Sámi girjjálašvuođa guovddážii Kárášjogas bearjadaga čakčamánu 18. b. dii. 19.00. 

Kárášjoga juoigit ávvudit beakkán juoigi gii ieš lea ollu juigiid juoiggahan NRK Sápmi juoigankonsearttain. Dál čoahkkanit sii juoiget ja juoiggahit Piera Balto. Dáidá ieš Piera ge juoiggastit soames luođi. Lágideaddji ČálliidLágádus guossoha borramuša ja juhkosa.

"Piera juoigá” LP skearru
"Piera juoigá” LP-skearru almmuhuvvui 1978:s. Juoigi ja luođit šadde jođánit bivnnuhin.
Olbmot besse návddašit luđiid, nugo  Normo-Jovnna, Lárina (Orbina), Biret-Elle, Dagfinn Balto, ja ollu eará luđiid.

Ohcalan CD
Olbmot leat guhkit áigge jearahan juoigis goas dáid čáppa luđiid bersset guldalit CD:as. Maiddái Piera ieš lea smiehttan dan seammá. Dál de viimmat ilbmet luođit CD hámis.

Ođasmáhttán jietnagovva
"Piera juoigá”  CD:as gulat juoigi fulkkiid ja oahppásiid luiid, luđiid mat leat dovddus, erenoamážit Kárášjogas. Mii leat ođasmahttán ja "lokten” ovddeš jietnagova, ja nu maiddái bidjan muhtin čuojanasaid, instrumeanttaid ođđasit.

Signere
Juoigandáhpáhusas 18.09. lea maiddái vejolaš oastit ođđa CD:a, maid Piera áinnas signere.

CD sáhttá maiddái oastit min neahttagávppis.

Piera juoigá CD:as oasážat
 



Ođasmahttán 01.09.2015
Almmuhan: Mihkku Solbakk