ČálliidLágádusa birra CL-Sámi academica GirjjálašvuođaguovddᚠOktavuohta
  Gálvoseahkka lea guorus
 

Biro bálvaleaddjit vai olbmuid buorideaddjit?
 

Dološ govat ožžon ođđa fuomášumi
 

Girjealmmuheapmi Guovdageainnus
 


Báikenamat Sámis 2 – Stedsnavn i Sápmi 2
Vuđolaččat dokumenteren báikenamaid

De lea ilbman nubbi girji min Sámi báikenammaráiddus. Dán girjjis lea Aage čielggadan Deanodaga guovllu, Horpmá-Hedeguohppi guovllu ja Sirpmá guovllu báikenamaid.

Dál vuot lea čálli bargan vuđolaččat, roggan erenoamᚠolu čálalaš gálduid, ja dasto jearahallan sihke eallilan olbmuid geat dihtet, ja maiddái nuorat olbmuid geat leat bajásšaddan guovlluin. Ulbmil lea leamaš gávdnat nu olu dieđuid go fal vejolaš vai sáhttá buoremusat čilget duogáža báikenamaide, ja nu maiddái mearridit mo daid galgá čállit sámegillii odne. Go girjjit leat sihke sámegillii ja dárogillii, de dat šaddet sámi báikenamaide erenoamᚠdokumentašuvdnan. Dasto leat girjjis ođđa kárttat maidda mii leat merken buot báikenamaid maid birra čállit

Dá moadde ovdamearkka ođđaseamos girjjis.

Luohttemuorjávrrit
Vuosttaslađas luohtte-: várra sánis luohttat, mii mearkkaša juoigat, gč. Friis (1887:406), ja mii ii šat geavahuvvo (luottat – luotan / luohttat – luohtan). Luohttemuorra mearkkaša dalle oaffarsoabbi, mii juoiggadettiin geavahuvvui oaffaruššat ipmiliidda.

Oaffaruššan sáhtii dáhpáhuvvat máŋgga láhkai. Dábálaš lei nu ahte ealli mii galggai geavahuvvot oaffarin, vuššojuvvui. De borre buot earret dávttiid, maid guđđe bálvvossadjái Ipmilii ávkin, dainna doaivagiin ahte sivdnidivččii fas bierggu dasa. Ealli varain vuidojuvvui bálvvossadji ja muorat dahje soappit mat ledje dasa ceggejuvvon. Dat galggai addit bivdolihku.

Várra leat leamaš bálvvossajit Luohttemuorjávrriid ja Luohttemuorvári birrasiin.

Leaibávttit
Leai- (várra oaniduvvon genitiiva sánis leaibi). Dáppe leat ollu bávttit Nilláleagi guvlui. Muhtun bávtti alde lea njealječiegat roggi gosa Sáráš-Elle lávii veallánit ”jápmit” go váivi givssidišgođii su. Dát gohčoduvvo namain Sáráš-Ellehávdi, čilge Terje Pedersen. Sáráš-Elle vissa gulai Bietta (Bjetta) sohkii, oaivvilda Liv Johnsen.

Uhccájávri
Lei muhtu Uhccá nammasaš almmáiolmmoš gii vissa lea meahcástan ja guolástan dán guovllus. Son lei báhtareaddji, gos nu boahtán, muitala Reidar Larsen. Muhto sus eai lean eambbo dieđut su brra. Terje Pedersen lasiha ahte son vissa ásai maiddái muhtn áigge Šuoššjogas. Uhccájávrri máttabealde lea Uhccájárluoppal.



Almmuhan: 30.06.2015
Almmuhan: Mihkku Solbakk