Stuorra media beroštupmi "Amerihká breavat" girjái

Sámit bálvalusas Alaskas "Amerihká breavat" girji álmmuheapmi lihkostuvai bures Guovdageainnus juovlamánu gaskkamutto. Mediat gokče viidát ČálliidLágádusa girjedáhpáhusa Guovdageainnu girjegávppis.

Ii das galle, sátnejođiheaddji Klemet Erland Hætta fas anii girjji nu miellagiddevažžan ahte ostii dan juovlaskeaŋkan buot suohkanstivrra láhtuide.


Guovdageainnu Lagašradio (GLR:a) doaimmaheaddji "Poasta Issát" Isak Nils Hætta jearahallá doaimmaheaddji Aage Solbakk girjji álmmuheami oktavuođas Guovdageainnus. Govven: Ámmun Johnskareng

Buori dološ govat

Girjedáhpáhussii ledje nuppelot olbmo boahtán, maiddái suohkana sátnejođiheaddji ja várresátnejođiheaddji.

Girjji doaimmaheaddji Aage Solbakk muitalii mo girji riegádii ja šattai duohtan. Son lei erenoamáš giitevaš, ja logai somá go nu ollu buriid dološ govaid ledje ožžon govvavuorkkáin ja universitehtain Alaskas

Duhtavaš

Guovdageainnu girjegávppi jođiheaddji Ranveig Holmen lei maid duhtavaš, go justa fal "Amerihká breavat girji" álmmuhuvai sin girjegávppis.

-Dán girjái han leat ollu Amerihkkái mannan Guovdageainnu sápmelaččat čállán, ja danin girji lea erenoamáš miellagiddevaš guovllu sápmelaččaide, logai son.

Girjegávppi jođiheaddji Holmen maid háliidii boahtteáiggis lágidit sullasaš girjeálmmuhemiid, ja bovdii ČálliidLágádusa fas boahttit sin lusa.


Guovdageainnu sátnejođiheaddji Klemet Erland Hætta ja Aage Solbakk. Govven: Ámmun Johnskareng


Edel Hætta Eriksen ja Aage Solbakk. Govven: Ámmun Johnskareng


Guldaleaddjit. Govven: Ámmun Johnskareng



Ođasmahttán 22.12.2009
Almmuhan: Mihkku Solbakk