Mij dáppe 3

7 Sebrudakmáhtto Mij vierttip oahppat guhtik guojmestimme. Mij ham vuojnnet gájka lip degu akta dán væráldin. Mij vierttip oahppat guhtik guojmestimme ja viehkedit guhtik guojmema. Jus mij ep åhpa guhtik guojmestimme ja ep ga viehkeda guhtik guojmema, de lip mij duobmidum. Rávvis goasskem - Gray Eagle – Ken Jackson. Nuortta-Amerika álggoálmmugijda sån gullu. Sebrudakmáhtto le máhtto dan sebrudagá birra gånnå mij viessop, ja gåktus mij galggap gárvedit dilev nav vaj máhttep aktan ráfálattjat viessot. Mij lip gájka sebrulattja iesjguhtik sebrudagán. Dan diehtij le dat ájnas ahte mij áhkuhip allasimme diedojt daj birra. Mij dárbahip ságastit ja gullat iehtjádij vuojnojt sebrudagá ássjij birra. Muhttijn mij dárbahip låhkåt ávijsajt, næhttasijdojt ja girjijt jali gæhttjat TV:an ja guldalit majt radio javllá. Dalloj de mij juojddá oahppap ja oadtjop ietjá ájádusájt, ja máhttep árvustallat mij le divnajda buoremus. Sebrudakmáhtto le ienep gå máhttet ja diehtet. Sebrudakmáhtto le aj berustit. Mij galggap berustit ietjama dajna gå miján le árvvo. Valla mij aj galggap berustit ja adnet duodalattjan aj iehtjádijt gejna mij aktan årrop ja gå siján aj le árvvo. Divnajn le åvdåsvásstádus gæhtjjat bærráj ahte sij gejna mij aktan visssop, oadtju dåbddåt jasskisvuodav ja buorrevuodav. Dán girje sebrudakfáhka oasen bessap mij låhkåt ja oahppat sáme sebrudagá oajvve dábálasj vuogij birra, identitehta ja kultuvra birra, media fámo, nuorravuodaájge, gárramabnnasij, næhttasebrudagáj birra ja dan birra gåktus værálda rijka barggi aktan.