Mij dáppe 3

103 Geografija Geografija le oahppa åvvå værálda birra. Geografija le grehkalasj báhko ja merkaj tjielggit ednamav. Jus galga dádjadit ja tjielggit ednmav, de viertti máhttet ållo ådå bágojt ja nammadusájt. Dajt bágojt viertti adnet anon gå ájgo tjielggit ábijt, várijt, jågåjt, jávrijt, ednamijt, stádajt ja bájkkenamájt. Geografija baktu oahppat gåktus ednam le sjaddam navti gå dat le uddni. Oahppat aj dálkij ja dálkájdagáj birra ja luondo birra. Geografija baktu aj oahppat gånnå ulmutja årru ja gåk sij barggi dåppen gånnå sij årru. Gå mij geografijajn barggap, de mij vásstedip gatjálvisájt: • • Man allak le várre? • • Gånnå le stáda? • • Makkár ednamtjærdda le duon jali dán rijkan? • • Manen le ednamtjærdda sjaddam dakkár? • • Gånnå li stuorra jávre? • • Gånnå årru ienemus ulmutja? • • Gåktus bierggiji da ulmutja? • • Makkár ressursa gávnnuji bájken jali rijkan? • • Gånnå li alla váre? geografija tjielggi ja buohtastahte bájkijt ja guovlojt dádjadit vuojnnet mij dat ja dat le ednamtjærdda makkár luonndo le dábálasj guovlon majt mij diehtep, duola degu vuodnaednama jali duoddarednama. ressursa ábnnasa ma gávnnuji luondon, duola degu guolle, boatsoj, vuovdde, silbba jali ruovdde