Mijjieh daebpene 3

98 Tjåenghkies-tjaalege – Ektesne eatnemem bueriedibie EN EN lea ektedimmie nasjovnh, mij golken 24.:den biejjien jaepien 1945 tseegkesovvi. Dïhte veartenevijries organisasjovne mesnie mahte gaajhkh eatnemen rïjhkh leah lïhtseginie. EN galka rïjhkide geehtedidh jïh almetjebovvelimmiem jïh diblemem tjöödtjestehtedh. EN gaajhki rïjhkigujmie jïh åajvaladtjigujmie tjåanghkene jïh raarahtalla. Ektesne laakh tseegkieh mejtie gaajhkesh dovnesh gelkieh seatadidh. Nimhtie voejhkelieh gaskesadtedh jïh rïjhki åålmegi jielemetsiehkiem bueriedidh. EN:n leah gellie organisasjovnh sijjen åelesne. Naaken dejstie leah almetjereakta-moenehtse, ILO konvensjovne jïh daalhkedh-paneele. Almetjereakta-moenehtse geehtede mejtie gaajhkide almetjereaktaj konvensjovnide jïhmaana-konvensjovnide seatadieh. ILO konvensjovne nr 169 aalkoeåålmeh-reaktide geehtede. Daalhkedh-/klæjmapaneele lea mealtan vaaksjoeminie jïh EN-rïjhkide reektie guktie daalhkedh-jorkesh eatnemen åålmegasse jïh eatnamasse sjidtieh. Nöörjen åajvaladtjh tjoeverieh EN:n konvensjovnide seatadidh, mejtie lin dåhkasjamme (ratifiseereme). NATO, WTO, OECD, EFTA/EØS ...leah gaskenasjonaale ektiebarkoeinstitusjovnh mah vaarjelimmien, ekonomijen jïh åesiestimmien gaavhtan berkieh.