Mijjieh daebpene 3

35 Aslaken lea mij joem, maam sæjhta doekedh Aslak maam joem hahtadamme. Satne sïejhme tjaetsiem vuajneme bovresne doekeldihkie. Dle Aslak ussjede satne aaj maahta dam darjodh. Sov gåetien duekesne tjirries gaaltije, mij ij gåessie gænnah galmh. – Almetjh båetieh mov raajne tjaetsiem åestedh, Aslak ussjede. – Varki jealamadtjine sjïdtem. Aslak tjalse-boehtelh 2 påastine dongkeme. Boehtelidie tjaetsine deavhta, kaassese beaja. Dellie staarese kaassine vualka jïh tjaetsiem faala åestedh. – Govlh almetjh, tjirries gaaltije-tjaetsiem doekem, aadtjegh boehtelidie deavhteme, Aslak tjåårve. Staaresne naa jïjnjh aalmetjh. Dah fuehpesne dohkh-diekie. Gaajhkesh dovnesh löövles pååssajgujmie goedtedeminie, gusnie gaajhkelaaketje åesiestimmieh goh laejpieh, voejh, mielhkieh, bearkoeh jïh vielie jïh ojhte! Muvhtesi hov aaj tjaetsieboehtelh, mejtie bovresne åasteme. – Gaaltije-tjaetsiem doekem, Aslak vihth almetjidie tjåårve. Badth ij gïeh gænnah tjöödtjesth satneste maam åestedh, eah sutnjien gænnah vïjlelh, skodtedeminie barre baaktoe. Iehkedi doekoe, Aslak ij leah boehtelem gænnah doekeme. Satne kaassam vihth bïjlese guadta jïh vualka vuejien. – Immanne naan væjkeles doekije, ussjede goh gåatan tjaanga. – Mejtie tjoerem giejnie soptsestidh, gie maahta doekedh, Næjlan lea reklaamesïelte, Aslak jïjtsasse jeahta. 2 Tjalse-boehtelh = gjennomsiktige flasker