Mijjieh daebpene 2

39 Soptsestimmiereaktah Almetji leah soptsestimmiereaktah dannasinie edtjieh maehtedh åvtese jïjtsh aarvoeh, mïelh jïh vuajnoeh buektedh, vuesiehtimmien gaavhtan politihke jïh jaahkoen bïjre. Dah edtjieh maehtedh jïjtsh aarvojde jeatjebigujmie digkiedalledh jïh edtjieh aaj jïjtsh aarvojde, vuajnojde jïh mïelide Internehtese, plaeride jïh jeatjah meedijidie maehtedh tjaeledh. Dovne almetjh jïh meedijh edtjieh maehtedh åvtese buektedh dam maam sijhtieh, jïh eah galkh dan gaavhtan bæsvodh. Læjhkan leah muvhth laakh mah geehtestieh daam reaktam. Ij leah luhpie jeatjabidie, njaalmeldh ij gænnah tjaaleldh, dibledh. Ij leah gænnah luhpie jeatjabidie bielhkedh jïh aejhtedh. Almetje gie nemhtie dåemede dellie bysvesåvva. Aktene demokratijes rïjhkesne lea luhpie vuesiehtidh ahte ij leah sïemes dej nænnoestahkigujmie mejtie reerenasse leah buakteme.