Mijjieh daebpene 2

28 Åvla Åvla 16 jaepien båeries baernie. Åvla lyjhkoe skovterinie voejehtjidh. Dejnie fïerhten biejjien mænngan skuvlem vuaja. Ij leah luhpie vuejedh skovterinie, goh dan ij leah naan vuejemekåarhte. Aehtjien lea skovtere gåetien veellesne. Skovteren lea tjoevtenje jïh aelhkie dam skovterem aelkiehtidh, vuejedh. Ikth Åvla voejehtjeminie dam ïentjem jïh dan gåetien bïjre. Dan gåetien veellese ammes bïjle båata, dïsse tjöödtjeste. Åvla sæjhta daejredh gie dïhte. Faahketji dle gaassese dabrene, jïh skovtere garre drïektine raakte bïjlen sontere vuaja. Åvla skovteristie gahtja. Buerie læhkoe goh dan lea garretjohpe åejjien nelnie, guktie nimhtie hov hijvenlaakan gåaradi. Dovne bïjle jïh skovtere hov smalhtjarieh. Jïh dïhte bïjlenaajhtere aajhta satne edtja Åvlam politijese bïeljelidh. Biejjieh vaesieh. Akten biejjien Åvla prieviem lienhtseste åådtje, gusnie tjåådtje, aamhtese politijese bïeljelovveme, jïh politije aamhtesem goerehteminie. Naan biejjieh viht vaesieh, dellie prievie båata påastine gusnie tjåådtje aamhtesem gïetedalleme, jïh Åvla lea meadtoehkinie bïeljelovveme jïh tjoevere båetedh Digkien uvte tjåadtjodh. Åvla gujhth advokaatem åådtje, gie edtja satnem vaarjeldih. Daate dïhte sov vaarjelæjja, ryöjredeminie dejnie ektesne Dægkan. Dennie digkesne leah dåapmerh, advo­ kaath, Åvla jïh dïhte gie lij aamhtesem Politijese bïeljelamme. Dovne dïhte gie lea aamhtesem Dægkan bïeljelamme jïh dïhte gïe lea bïeljelovveme edtjijægan jïjtsh vuajnojde åvtese buektedh. Dåapmere hov dejtie laakide gïehtjede, jïh destie gaavna gåabpa reaktoe. Daennie aamhtesisnie dïhte dåapmoe naemhtie sjædta: Åvla tjoevere bïjleaajhterasse bïjledåvvomen åvteste maeksedh, goh luhpehth skovterinie vuajeme. Dejnie lissine dåapmoe nimhtie sjædta, Åvla tjoevere vuertedh göökte jaepieh åvteli goh jïjtje vuejemekåartem åådtje.