Mijjieh daebpene 2

23 Nöörjen stööremes, jïh aaj muvhth ålkoelaanten plaerieh dan aamhtesen bïjre tjeelin. Aaj TV:sne lij muvhtene naa jïjnje dan aamhtesen bïjre. Almetjh Nöörjesne jïh Eurovpesne lin bååhperamme jïh magkalamme. Naa jïjnjesh idtjin daejrieh man jïjnjem saemiej bïjre. Muvhthhov saemide dåarjoejin, jïh aaj dam aamhtesem vuastaladtin. Dah åajvaladtjh læjhkan jeanoem baadtehtin. Daehtie aamhtesistie naa jïjnjesh sjïdtin saemiej bïjre lïeredh, saemieh lin annje daennie rïjhkesne årroeh, jïh sijjen leah jïjtsh gïele, kultuvre, vaajesh, jieliemassh jïh vuekieh, voeth mah leah jeatjhlaakan goh Nöörjen almetjh. Nöörjen seabradahke jeatjahtovvi, dannasinie goh almetjh lin jienebem lïereme, jïh eelkin jeatjhlaakan ussjedidh saemiej jïh saemiej reaktaj bïjre, jïh aaj eelkin saemien aamhtesidie dåarjodh. Saemieh jïjtjh aaj krïebpesjin åadtjodh mealtan årrodh aamhtesh nænnoestidh, mah sijjide baajnehtin. Nimhtie orre åssjalommesh sjïdtin jïh seabradahke jorkestovvi. Dellie daerpies orre laakem tseegkedh jallh båeries laakem jeatjahtehtedh. Jaepien 1988 Stoerredigkie orre laakem jååhkesji mij lissine maadthlaakese sjïdti. Dïhte lea dïhte saemienlaake. Saemienlaakesne naemhtie tjåådtje: Grunnlovens § 108. «Det paaligger Statens Myndigheter at Lægge Forholdene til Rette for at den samiske Folkegrupe kan sikre og udvikle sit sprog, sin Kultur og sit Samfundsliv” Saemiedigkie jaepien 1989 tseegkesovvi. Saemiedigkie edtja vuartasjidh mejtie saemieh åadtjoeh jïjtsh aarvoeh, vuajnoeh åvtese buektedh mah sijjide jïh jeatjah aalkoealmetjidie vihkele. Gånka Olav 5. dam voestes Saemiedigkiem jaepien 1989 geehpehti.