Mijjieh daebpene 1

96 Piere jïh Maarja möörjeminie – Piere, Piere vuelkieh daelie möörjedh! Tjidtjie jeehti dan jaepien jïjnjh jokngh jïh sirrieh skåajjesne, Maarja Pierese jeahta. Dah guaktah lægan gåetide skuvleste ajveme. – Hmm .. dïhte gujht sjyöhtehke, Piere aavone vaestiedi. – Men voestes tjoerem laavenjassine barkedh. Mijjieh daelie kaarhtine barkebe skuvlesne, jïh mijjen leah gellie laavenjassh mejgujmie edtjebe jirriedasse barkedh! – Jaavoe, mov leah aaj laavenjassh. Gåessie datne dejgujmie riejries? Maarja gihtji. – Jaahkam tæjmoem, men tjoerem aaj byöpmedidh, jis månnoeh vïjhte aejkesne vuelkien? – Jaavoe, dïhte sjyöhtehke, dellie månnoeh gaavnesjien mijjen luvnie tsåahka vïjhte! Maarja jeehti jïh gåetide vaedtsieli. Maarja skåajje-raedtesne årroeji ånnetji guhkebe enn Piere. Maarjan ståapoen raejesne stoerre skåajje, jïh dubpene gellie sijjieh gusnie pråvhka buerie muerjiesijjieh årrodh. Maarja lij joe verandesne tjahkesjeminie gosse Piere sygkelinie bööti vuejien. – Datne joe riejries? Piere Maarjese mojjehti. – Datne gujht sïjhth möörjedh daenbien? – Die leam, mov mïelesne lea fïerske joknge- muerjieh dan njaelkies fïerske laejpesne. Aehtjie lea bååhkesjamme daelie! Vuelkien daelie! Maarja jeehti. Dah guaktah skåajjese mïnnijægan vaarren baalkan mietie mij ståapoen luvhtie. Gåabpatjahki ligan bæhtoe gïetesne. Dah guaktah boelhkem veedtsigan jïh belneste balnan vuejniestigan, men idtji lij jïjnjh muerjieh. – Månnoeh baalkan luvhtie vaedtsien. Manne jaahkam duebpielisnie lea jienebh jokngh enn daesnie, Maarja jeehti. Dellie dah guaktah baalkan luvhtie veedtsigan jïh skåajjen sïjse mïnnigan. Dah guaktah veedtsigan belneste balnan, men idtjigan jïjnjh muerjieh gaavnh gusn’akt. Jïh mïnnigan ennje skåajjen sïjse jïh muerjide ohtsedigan. – Hei Piere, Maarja tjåarvoeji. – Båetieh diekie, daebpene jïjnjh muerjieh! Maarja belneste balnan vaarri jïh Pierese dejtie jïjnjh jokngide vuesiehti. Dïhte lij dan aavone maajetjh muerjide gaavni. Piere jïh Maarja vissjeles bihkigan, juktie daesnie lij dan aelhkies bihkedh, idtjigan daarpesjh vaedtsedh ohtsedidh. Idtji guhkiem vaash eannan gåabpatjahkh ligan bæhtojde deavhteme. – Daesnie gujht luste möörjedh, Maarja jeehti mujjehten. – Byöroen mubpie bæhtoem aaj meatan vaalteme! – Novh gujht edtjien, Piere vaestiedi. – Men daelie riejries. Månnoeh gujht maehtiejægan diekie viht. Daelie månnoeh ryöktesth gåetide. Piera jïh Maarja skåajjesne veedtsigan, jïh såtnoeh veedtsigan. Jïh idtjigan baalkam jaksh mestie laahpeme – Mennie min månnoeh lægan tjaajanamme? Maarja Pierem gihtji. Maarjan tjoeje mahte dierkiesti. – Hmmm ... ij edtjh gan dan guhkies baalkese, Piere jeehti, jïh lissiehti: – Jaa, daelie gujht lea balvedh-laaketje, ean månnoeh vuejnieh gusnie biejjie lea!! Daelie lea tsåahka govhte, jïh dellie biejjie åarjene, Piere buerkiesti. Maarja jïh Piere tjahkasjigan jïh voejhkeligan goltelidh tjoejh voeneste, men idtjigan maam akt govlh. Ij maam akt govloe. – Manne gujht jaahkam